Seminario 3: L’ARAGONÉS N’O MUNDO ANIMAL

Seminario 3

L’ARAGONÉS N’O MUNDO ANIMAL

As luengas espresan a traduzión cultural d’a reyalidá. A reyalidá no esiste, ye meyata por a cultura y espresata por os lenguaches, uno d’os cuals ye a luenga, semos una espezie simbolica. A fauna ye una parti fundamental d’as culturas umanas. Ye un recurso pero tamién una soziedá paralela que as culturas fan serbir a modo d’espiello, y ixo dende a más biella antigüedá.

Encara que os simbolos pueden permanexer e trespasar o tiempo, ni a fauna, ni a soziedá ni a cultura son elementos estaticos. Cambean e con ellos cambea tamién a suya relazión, e por as mesmas, o lenguache que la espresa. O lecsico s’organiza en tacsonomías con una loxica interna que representa todas istas balors istoricas e simbolicas, cada cultura arrozega a suya eboluzión, a suya suma de pueblos que ban farchando ixa loxica. En o caso d’o campo d’a fauna en aragonés, por exemplo, se da una dualidá indopeuropeya, un orichen latino e otro paralelo no latino (zelta, chermanico…) que charra d’imbasions e repoblazions á o largo d’a istoria.

Una relazión entre una luenga situgata cheograficamén pero que entiende a fauna en terminos culturals e por tanto, dende os suyos orichens mira d’asimilar espezies que conoxe «de oíu», como os orifans de Marco Polo, os dragons de Brunetto Latino, os bediellos marinos cualas piels dentraban por as aduanas d’o reino u os crabers que o mosen d’A Espuña, en o sieglo XVIII diz conoxer pero no aber bisto nunca. U a choliba que Azara describe en o Paraguai e que baltiza asinas por ser parexita a ras cholibas d’a suya nineza en o Semontano.

As tacsonomías, os nombres d’a fauna en aragonés, tresminan istorias de mitos que nombran onsos, que achuntan paniquesas con salamanquesas u que fan parar cuenta de guardafuens e bombolons.

L’obxetibo d’a charrada ye rechirar una mica en ista relazión cultura – naturaleza a trabiés d’a luenga aragonesa, dende os orichens dica l’autualidá, como meyo d’entender millor cómo se farcha o lecsico d’a fauna en a nuestra luenga.

Iste seminario sobre es nombres d’animals en aragonés será dirixiu per Rafel Vidaller Tricas, mayestro, guardia forestal y autor d’obras como Libro d’as matas y os animals. Dizionario Aragonés d’Espezies Animals y Bechetals

Enzipiará con una presentazión feito per Vidaller en las viellas escuelas del llugar de Santa Maria de Merlès. Dimpues, se convidará es asistents á un minchar de carni á la brasa. Allora, per la tardi se fará una visita al Zentro de Fauna Salvache “Camadoca”, an veyerem animals autoctonos y invasors d’el Periné: paxaros, mamiferos, peixes, reptils y més. Finalmén, alliberarem bel animal recuperau y visitarem la Riera de Merlès, que corre amán del Zentro Camadoca.

Orario: de 12 a 18 oras.
Pre del seminario: 15,00 €
Masia Camadoca, s/n, 08517, Barcelona

Seminarios:

Organiza:

Colaboran: